اخذت قرار الي رح يغيّرلي حياتي

كمان شوي بصير ٣٠,

٣٠ سنة!!, مش قلال!

من خلال شغلي كطبيب عائلة كنت اشوف انه كثير ناس بالثلاثينات ببلشو يحضرو حالهن للتقدم بالسن

بصير عندهن اوجاع راس, اوجاع مفاصل وظهر, المناعة بتعدش باحسن حالة

بصير في عندهن اكم من حبة بقائمة الادوية الشهرية..

هذا الاشي خلاني اخاف على حالي, وبالاساس على صحتي

لأنه اولاً.. مهنتي طبيب, وحسب رايي لازم أكون مثال منيح للمتعالجين

ثانياً احنا نِتاج عن المجتمع تبعنا, وعن الناس الي حوالينا, يعني قديش ممكن التفاحة توقع بعيد عن الشجرة؟!

٣٠ هو الجيل الي بتبلش الناس تتغير تختلف فيه عن بعضها

يعني ممكن تشوف واحد عمره ٣٠ ومبيّن عليه انه “بعده ولد”, وواحد ثاني مبيّن اكبر من عمره!

لما عندك حرب بأكثر من جبهة, وعم بتقاتل بس بوحدة منهن, رح تصفي خسران بكل الجبهات وربحان بس بوحدة منهن.

هيك الي بوصل على جيل ٣٠,

عنده شغله الي بده يتمركز فيه ويتقدم فيه,

بده يجمع مصاري ويثبّت حاله مادياً,

بدوّر او لاقى شريك\ة حياته

مجتمعه, عيلته, اصدقائه

وفوق كل هذا بده يدير باله على صحته!

عنجد كثير! ومش هويّن بالمرّة !

بدناش نحكي نصائح عن كيف نتعامل مع هذا الجيل, لأنه ملان ناس مخوّله اكثر مني تحكي عن هذا الاشي

ولكن انا بعرف احكي عن الصحة, عن تجربتي الشخصية وشو عم بعمل تجاه هذا الاشي..

القرار الي اخذته هو انه ابني عضل, قوة وليونة

كلهن هذول عشان اكون اسا بصحة احسن وكمان “أخَتيِر” بطريقة افضل

الكتلة العضلية هي احسن anti-aging موجود

بتمشي, تقعد عالكرسي, تقوم عن التخت, ترفع شغلة وقعت منك عن الارض, تحمل ابنك,…

كلها شغلات رح تضل تعملها كل العمر, كلها بدها عضل, قوة وليونة

الشغلة المهمة الثانية الي كتلة العضل بتلعب فيها دور كبير هي عملية الايض (metabolism)

المعادلة بتمشي هيك: كتلة عضلية اكثر -> ميتابولزم افضل -> حرق سعرات حرارية اكثر.

وهيك كمان بنفع: كتلة عضلية اكثر -> مستويات سكر متوازنة اكثر بالدم -> خطر الاصابة بمرض السكري اقل

بحسب الابحاث صحة العضل بتأثر بشكل مباشر على صحة باقي اعضاء الجسم.

وبحسب كمان ابحاث, البنادم بخسر حوالي ٣٠٪ من الكتلة العضلية خلال عمره

عشان هيك مفضل انه تبني اكثر ما يمكن كتلة عضلية لما انت شب.

وكأنك هيك “بتْغِش” ونقطة البداية تاعتك بتكون احسن بكثير من نقطة البداية تاعت شخص ما بتمرّن

صار المقال طويل ولكن بعد في كثير شو نحكي عن الكتلة العضلية

عن دورها بالمناعة, بالشيخوخة, بصحة العقل وتجديد الخلايا, افراز الهورمونات, المزاج…

كلها هاي شغلات رح احكي عنها بالمستقبل القريب

تابعوني على صفحة الحكيم بالانستاغرام عشان تشاركوني برحلتي ببناء عضل, قوة وليونة وعالطريق جسم حلو قبل جيل ٣٠

وبلكي هيك تشجّعتو ومشينا مع بعض بهاي الطريق..

وهذا لينك لكل واحد حابب يبدا ومش عارف كيف, او وصل لنقطة ومش يكمّل منها