زي ما سمعتها, ااه

العقل السليم في العضل السليم

شو خص العقل بالعضل؟

بقولو الحركة بركة, بس مش اي حركة

زمان كنا نفكر انه المشي هو احسن نوع تمرين ممكن نعمله

ما عندي اعتراض على هذا الاشي, والمشي بتضل مكانته محفوظة لانه حكوا عنه بالايورفيدا وقديش ممكن يساعد بالهضم. بس هاي لمقال ثاني..

لكن المشي لحاله بكفّيش!!

الابحاث الجديدة اليوم كلها مركّزة على تمارين القوة وعلى بناء العضل

وكأنه اكتشفنا اهمية العضل من اول وجديد

لدرجة انه صارو يسمّوا العضل: organ of longevity (عضو اطالة العمر)

بعدني ما التقيت بناس الي ما بدها تعيش اكثر ما يمكن, ولكن بشرط..

انه عقلهم يضل معهم

وهون بيجي دور العضل وتمارين القوة

بعالم الطب اليوم في اصوات الي عم بتسمي الالزهايمر- السكّري النوع الثالث

اليوم منعرف نوعين:

١. سكّري الاطفال- النوع الاول, نتيجة طفرة جينية بافراز الانسولين

٢. سكّري مقاومة الانسولين- النوع الثاني (الاكثر شيوعاً), عادة عند البالغين, كنتيجة لنظام حياة واكل سيئين

٣. سكّري النوع الثالث- الخلية العصبية, واللي مصدر طاقتها هو السكر, ما بتعود قادرة على استغلال السكر الموجود بالدم. الشيء الي بأدي لموتها وتلف خلايا الدماغ.

والابحاث بتفرجي انه الناس الي بتعاني من سكّري مقاومة الانسولين (النوع الثاني) عرضة اكثر من غيرهم لامراض تلف الدماغ ومنها الالزهايمر.

طب شو علاقة تمارين القوة والكتلة العضلية؟

مجرّد تمرين واحد بحسب الابحاث الجديدة, ممكن يرفع حساسية الخلية للانسولين,

يعني بكلمات اخرى, تمارين القوة وبناء العضل بتحمي من امراض تلف الدماغ

بتصوّر هذا سبب كافي يحفزنا نتمرن, خصوصاً بعالم اليوم الي فيه اعداد مرضى تلف الدماغ عم تتضاعف كل ٢٠ سنة !

واذا هذا مش سبب مقنع كفاية فعندي كمان واحد..

كل عمره العلم بعرف انه خلايا الدماغ لا تتجدد ! ولكن..

مؤخراً, اكتشفوا انه العكس هو الصحيح, والدماغ قادر على تجديد خلاياه

الدماغ يفرز مواد تسمى myokines القادرة على تجديد خلايا المخ,

تمارين القوة ممكن تغير التوازن على مستوى الخلية, بحيث انها تصبح قادرة على افراز الميوكينز بشكل اكبر.

يعني تمارين القوة وبناء الكتلة العضلية مش بس بحافظوا على خلايا الدماغ الموجودة, انما بساهموا ببناء خلايا عصبية جديدة.

بعد في اسباب كثير, رح نحكي عنها بالمستقبل القريب, تابعوني عشان اذا ما اقتنعتوا من هذا المقال, اقنعكوا باللي بعده.

واذا اقتنعتوا بس مش عارفين من وين تبلشوا, توجّهولي. انا بقدر اساعدكوا مثل ما ساعدت كثار غيركم.